Tanah Karo Online [ Tanahkaro!Foundation ]

I bas kalak karo sini i kataken kalimbubu karang, e me kalimbubu si ni angkat. adi genduari enggo jarang kal kita kalak karo ningetken kai ? kin I kataken kalimbubu karang ras Uga perumpamanna maka lit I kataken Kalimbubu Karang

Nai sangana jaman paksa pemanteken kuta ( manteki kuta ) biasana sekelewet kuta i ban kerangen, ningen e Kerangen Kuta janah lit pagar Kuta. Sini i kataken kuta eme jelas ise simanteki kuta e i kataken Pengulu,janah lit ka anak beru kuta.

Setiap Kuta lit ka kesainna menurut terpukna Ibas kuta e ingan tading e me rumah adat si erbage bage jenisna, Si galangna e me si ni i kataken Rumah lige si ni tading i je lit sepuh dua jabu, emaka lit rumah si waluh jabu, lit ka rumah si empat jabu, si dua jabu ras lit si sada jabu ngenca . Tambah sie lit ka ingan nuan kesaya kesaya sekelewt kuta e sini ikataken reba. I bas reba e i baham me karang karang ingan asuh asuhen erberng, entah karang kambing, karang lembu, karang manuk, karang kuda ras sidebanna. Karang karang asuh asyhen e iban deher kuta, gelah mesukah ngenensa janah ngontrol asuh asuhen e . Biasana lit ban ingan medem guna si erjaga adi berngi, gelah ula pang pinagko reh. Karang-karang e biasana i jagai alu kerin, (ergiliren) menurut kesain. Anak peran biasan medem i jambur, siguda nguda pe medem ka ras bibina .

Adi nai la piga jelma melasang nguta nguta perban biasana anak kuta lit asuh asuhenna si deban berupa siengkawali kuta , e me i kataken begu jabu ras begu juma, perban sie adi lit jelma si reh mis terteh, sebab la lit inganna medem. Adi lit sekalak entah sada keluarga si reh ku kuta e perban sada masalah,entah atena mindo ingan tading i bas sada kuta harus betehen pengulu ras anak beru kuta, sebab adi la betehen i anggab ia kalak tandang si Banci saja i curigai sekalak pinangko entah klak jahat, jadi banci saja i bunuh anak kuta. tama si e, anak kuta mbiar perban jelma tandang e banci kari i cekak asuh asuhen anak kuta adi la lit si naggung jabapisa.

Adi lit kalak tandang ku kute e anak beru kuta Ndarami isekin si biak kalimbubu si reh e inganna tading . kenca dat inganna tading (si bersedia ngalo ngalo ia ) makana untuk sementarai ban inganna I bas sada karang, sope lengan I ban rumahna I bas kuta e.

Perbahan nai megati lit sada keluarga entah sada jabu terpaksa pindah nadingken kutana, reh ku kuta si deban erkiteken sada persoalen entah kesusahen, maka keluarga e ndarami ingan tading sada keluarga erkelang kelangken anak beru kuta, bagepe buat-buatenna. Ise ndube biak kalimbubu singalo ngalo kerehenna janah si mereken karang man bana bage pe buat buatenna, seh terus ku kinursurenna pe Pagi Ia i kataken kalimbubu karang.

bagi enggo si eteh,maka I bas jaman si adi, sada kuta I gelari perban I kuta e tading anak kuta sentudu ras peradaten geluhna, janah ringan I bas kesain rikutken terpuknabagepe mergana, janah rikutken uga bentuk rumahna janah I bas rumah siapai jabuna e nandaken kai golongenna baws terpukna e.. Alu bage enggo jelas kerina kecibalna rikutken golongen ras derajatna. Ingan tunduh pe enggo ratur kerina I ban bas sada kuta. Si enggo erjabu ringan medem I rumah e me rumah adapt, Anak Perana medem I jambur ras kerina sebaya-sebayana menurut terpukna

E makana adi lit jelma tandang, mis i orati , perban lenga i eteh sima-simana, tentu ertutur lebe seh asa jelas ugakin situhuna maka ia reh, janari kutana, ras ise si man dahinna. Kenca enggo jelas , maka I darami si biak sembuyakna, ras kalimbubuna , sebab nai labo denga lit KTP entah surat pengantar entah surat mandah bagi si genduari.I je fungsi anak beru kuta she kal pentingna, sebab adi nai kalak tandang e mis I tes entah lit kin baba-babanna. Alu kebeluhen sekalak anak beru kuta, maka kalak tandang enda selamat sebab labo si eteh adi kalak tandang enda nadi banci saja kalak , papak, entah kalak pinangko, entah kalak lompat bergi, peraji-aji, perutang-utaagng, entah pinangko, pembunuh ras sidebanna.

Adi enggo iakap jelas, emaka anak beru kuta ngelapor man pengulu. Kenca pengulu ngatakensa banci ia tadin I kuta e , I darami mis inganna tadding, keluarga apai kin si rutang pusuh nandangi ia tapi labo I rumah adapt tapi I bas sada karang si biasana I ban deherken reba-reba kuta

Adi nai maka bage ban, perban kerina jelma I ban pemetehna, entahpe sijaga daging nian. Emaka harus metenget, janah pe labo kita banci melasang kujah-kuje I tengah kesain kuta adi langa si eteh situasina, perban kalak sidekah kerina erasuh asuhen(begu jabu ras begu juma)

E maka kalak si enggo ni aloken tading ibas sada kuta I permatai piga piga bulan dekahna (adi cakap si genduari I kataken I karantinaken) ngeteh uga kin situhuna sifat ras karakterna, tempas na , si bujur ntah si ilat.

Adi ei bas piga piga wari , entah pigapiga minggu entah pe piga piga bulan si tandang ndai nuduhken kini ulinna, e maka I atanken ia I bas peradaten nggeluh rikutken kebiasaan bas kurta e, tapi kune la beluh ia mamba diri, e I cabur pinangken mis. I taruhken ku pager kuta I bas gemgemen anak beru kuta I saksiken anak kuta I pelawes ras lanai banci reh ku kuta e.

Perban nai kerina kuta I keleweti kerangen , maka si enggo pelawes I bas kuta nari lanai I arapken mulih perban I akap enggo mis I pan arimo teah binatang buas.

Tama si e nai lit nge rusur peperangen antar kuta, jadi kune sanga si e lit perjengilen antara kuta e si gempangen nge adi lit sekalak jelma ndarat la erkawal, mis nge retap I tampul . E maka tuhu tuhu kebiaren kal adi nai. Sebab si nai pe lit denga ka nge sini I kataken musuh berngi e pe kenca tahun 1900 tap sebelum na e cukup ngeri nge kerna turi-turin kalak Karo.

Tapi adi I akap anak beru Kuta ia i teki, e maka i pindona man Kalimbubu si mada kuta/Si majek Lulang /Pengulu kuta gelah bereken buatenna guna kegeluhenna jadi anak kuta e. Alu bage enggo I atanken ia bas si kai kaipekerna peradaten nggeluh Tama dekahna ia tading I kuta e erpenandai kerina jelma man bana e maka tetap ia harus mehamat man kalimbubuna sini lit ije si mereken karang man bana ndube .

E maka kalimbubu inganna I endesken ndube ni I gelarken Kalimbubu Karang . E maka adi npejabuken anak gia ia pagi, entah mengket rumah(rumah adapt) arus maka lit amak kundulen kalimbubu karang ndube. Perban ia me si mereken karang ingan kejuah-juahen, buaten guna erjuma ras kerina ugas ugas guna ndahiken kerina pendahin.

Adi genduari enterem lanai ngangkasa kai kin ertina ras fungsi Kalimbubu Karng paadhal nai kalimbubu karang e megati kal la ieteh bedana ibahan sada sukut jabu mereken kehamaten , aminna gia mawen jumpa dengan ras kalimbubuna kal sentudu ras sangkep nggeluhna. engkai ? maka bage, perban kini ulin si enggo bereken kalimbubu karang sangana kesusahen ndube lebih I akap ertina, sebab sanga si susah ndai lalit si nggit si ngalokensa ras nanggung jabapisa alu mereken karangna lakap lit tanaeh kerah., sebab bagi kata ndai adi I cubai sekalak jelma si la erkawal, siap naringe. Perbahan adi nai sekalak si ncubai la ia ngenca tapi ikit ras asuh-asuhenna, janah pe adi la itandai anak kuta ia, banci mis ia I geleh anak kuta si ni I dapetina e.

Kenca ia sangap bas nuan nuan entah er asuh- asuhen, kalak si reh ndube nehken kehamaten nge alu mereken ulih jamana entah maba manuk entah kambing adi lit kenca kerja tahun entah merdang merdem I bas kuta e. Pertama tama si I hamati e me Kalimbubu I bas kuta e (kalimbubu Karang) sebab ia me gancih Dibata ni idahna.. janah Kalimbubu kaarang e pe nehken toto ras pasu-pasu guna kini ulin anak beruna, enggo me seri penami-namina man sir eh bagepe man si sangkep geluhna sada dareh.

Aminna ndube ia I suruh tading I karang lembu, enth I karang kambing, entah I karang babi entah karang kuda sekali gia, perban enggo me sangap entcari ras ertuah bayak bekas pemere kalimbubu sini I dapeti nai, enggo me seri ergana ni akap ras kalimbubu si asli e.

E maka megati nai adi erbahan, mengket rumah, pejabuken anak, perumah tendi ras merdang merdem ras sidebanna, kehamaten sini ibereken man kalimbubu karang e la lit bedana ras ku kalimbubu sangkep nggeluh si asli. Amak kundulenna pe I bas jabu sukut, seri nge I ban .

E maka jelma si noria, adi enggo pang lawes nadingken kuta entah erlajang, entah lompat berngi ban utang, entah ban penakit, entah ban kai gia ,enggo me pang I geleh ntah pe I pan rubia-rubia kerangen, janah adi lit si engkakui ia, mis kal banna jadi simehamatna. PErbahan adi la beluh ia nehken kehamaten labo kin banci ialoken I kuta japa pe sanga paksa sie. Tama si e lit kalimbubuna si engkakui ia I bas kuta perlajangenna she ia banci nggeluh alu dem kejuah-juahen.

Write comment
Name:
Email:	do not notifynotify
Website:
Title:
UBBCode:	-color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge
	Please input the anti-spam code that you can read in the image.

3.22 Copyright (C) 2007 Alain Georgette / Copyright (C) 2006 Frantisek Hliva. All rights reserved."